Saturday, January 23, 2010

လတ်လတ်ဆက်ဆက်ည

လတ်လတ်ဆက်ဆက်ည

ညလေးက လတ်ဆက်လိုက်တာ
လလေးက သာလို့
ကွေးကွေးလေးရယ်..
ကြယ်လေးတွေ တရုံးရုံးနဲ့
သူပျော်နေရှာပေါ့......။

ညလေးက ချစ်စရာကောင်းလိုက်တာ
လလေးကိုကြည့်ပြီး
ချစ်သူဆီ စကားတွေပြောနေတယ်..
ကြယ်လေးတွေသိရင်
ရယ်များရယ်နေမလား.....။

ညလေးက နှစ်သက်စရာ.
လလေးကသာလို့
ဒီချိန် မှာချစ်သူ
ဘုရားရှစ်ခိုး နေမလား
ဆုတောင်းမေတ္တာ ပို့နေလား..
သူ့အသံလွင်လွင်လေး ကြားနေရတယ်....။

ညလေးက ကြည်နူးစရာ
လလေးကသာလို့...
ဘ၀ရဲ့ အမောတွေ ခဏမေ့ပြီး..
ညလေးရဲ့ အလှကိုခံစား..
အသံလေးများလည်း ကြားနေရတယ်..
ဟိုးအဝေးဆီကပေါ့...........။ ။

ဖိုးသူတော်


၂၃.၁.၂၀၁၀

၂၁ နာရီ ၃၀ မိနစ်

Photo source : Internet

Thursday, January 14, 2010

Utopia Dream


ယူတိုးပီးယားအိပ်မက်


တစ်ညမှာ ကျတော်အိပ်မက်တစ်ခုမက်သည်။ အိပ်မက်သည် ရှည်လျားလွန်း၍ အသေးစိတ်နိုင်လွန်းသည်။ အိပ်မက်ထဲမှ ဇာတ်ကောင်သည် ကျတော်ပင်ဖြစ်နေသည်။ ပထမဦးဆုံးအနေနဲ့ ကျတော်သည် အင်ဂျင်နီယာဘွဲ့ကိုရရှိသည်။ ထိုပြင် မဟာအင်ဂျင်နီယာဘွဲ့ကိုထပ်ရသည်။ ထိုဘွဲ့ရပြီးနောက် ကျတော် အင်္ဂလန်ရှိ နာမည်ကြီး တက္ကသိုလ်တစ်ခုတွင် အင်ဂျင်နီယာ ဘာသာရပ်နဲ့ မသက်ဆိုင်သလိုဖြစ်သော နိုင်ငံရေးသိပ္ပံနှင့်လူမှုရေးသိပ္ပံနှစ်ဘာသာတွဲဖြင့် မဟာဝိဇ္ဖာဘွဲ့တစ်ခုထပ်ရသည်။ ထို့နောက် အမေရိကရှိ တက္ကသိုလ်တစ်ခုမှ ထိုဘာသာရပ်နှစ်ခု အကြောင်းပြုပြီး ပါရဂူဘွဲ့ရသည်။ ကျတော် ဒေါက်တာဖိုးသူတော် ဖြစ်သွားသည်။


ကျတော် မြန်မာပြည်ပြန်လာသည်။ ထိုအချိန်တွင်ကျတော့ အသက်သည် သုံးဆယ်တော်တော် ကျော်ခဲ့ပြီ။ မြန်မာပြည်ပြန်ရောက်ရောက်ချင်း ပထမဦးဆုံးအနေဖြင့် ပတ်ဝန်းကျင်နဲ့ သဟဇာတဖြစ်အောင် လုပ်ရသည်။ ဆိုလိုသည်မှာ ကျတော့ အင်ဂျင်နီယာဘာသာရပ်နယ်ပယ်သို့ပြန်သွားသည်။ ခဏလောက်လုပ်ကြည့်ပြီး စိတ်မ၀င်စားတော့။ ကျတော့်စိတ်ထဲဖြစ်ချင်နေတာ တစ်ခုရှိသည်။ ဒါကို ကိုယ့်ဟာကိုယ်သိသည်။ အဲ့ဒီနောက် ကျတော် လက်ချိန်ရှိ နိုင်ငံရေးပါတီတစ်ခုနှင့်ချိတ်ဆက်မိပြီး ပါတီကော်မတီဝင်တစ်ယောက်ဖြစ်လာသည်။ ပါတီတွင် ကျတော်ကြိုးကြိုးစားစားဆောင်ရွက်၍ ပါတီ ဥက္ကဌနှင့် လူကြီးများ၏ အားထားမှုကိုရရှိလာသည်။


ကျတော် ပါတီဝင်ပြီးနောက်တစ်နှစ်မှာပဲ ကျတော်တို့ ပါတီ အာဏာရပြီး ပါတီအကြီးအကဲတစ်ဦး နိုင်ငံတော် သမ္မတဖြစ်သွားသည်။ နိုင်ငံတော်ဖွဲ့စည်းပုံအခြေခံဥပဒေများလည်း ပြင်သင့်သည်များ ပြင်ပြီး၍ အတော်အတန် ပြောင်းလဲနေသော အခါသမယလည်းဖြစ်သည်။ ပါတီလူကြီးသည် သမ္မတ ဖြစ်ပြီးနောက် သူ့၏ ကက်ဘိနက် အဖွဲ့ ဖွဲ့သောအခါ ကျတော့်အား ၀န်ကြီး တစ်နေရာပေးသည်။ သို့ဖြင့် ကျတော် အသက်လေးဆယ် မပြည့်သေးခင်မှာပဲ မြန်မာနိုင်ငံ၏ အသက်ငယ်ဆုံး ၀န်းကြီးတစ်ပါး ဖြစ်လာသည်။ ကျတော် တာဝန်ယူရသော ၀န်ကြီးဌာနက ပညာရေးဝန်ကြီးဌာန။


ပညာရေးဝန်ကြီး ဒေါက်တာဖိုးသူတော်သည် နိုင်ငံတကာတွင်လည့်လည်ပြီး ပညာသင်ယူခဲ့သူ ပီပီ အခြေခံအားကောင်းသော ပညာရေးစနစ်ကို နားလည်သည်။ ထို့ကြောင့် ပညာရေးစနစ်များကို အခြေခံမှ စ၍ လိုအပ်သည်များကို တဆင့်ချင်းပြောင်းလဲသည်။ ကျေးရွာများ၏ မူလတန်းကျောင်းများထိ ကိုယ်တိုင်ကိုယ်ကျသွားပြီး ဆရာ၊ဆရာမလေးများနှင့် ဆွေးနွေးသည်။ ကလေးများ၏ ပညာရေးအပေါ် စိတ်ပါဝင်စားနိုင်မှုနှင့် လိုက်နိုင်မှုများကို အသေးစိတ်သုတေသနပြုသည်။ ထို့နောက် ပညာရေး ကော်မတီနှင့် ညှိနှိုင်းပြီး မူလတန်းအတွက် အသင့်လျော်ဆုံးသော ဖတ်စာ စာအုပ်နှင့် လက်တွေ့လုပ်ဆောင်ရေး စာအုပ်များကို စနစ်တကျ ပြင်ဆင်သည်။ ထိုမှ တဆင့် တဆင့်ချင်းတက်၍ အလယ်တန်း နှင့် အထက်တန်းကို ခေတ်စနစ်နှင့် အညီ ဒေသတွင်းနိုင်ငံများနှင့် တန်းတူ တန်းညှိပြီး သင်ကြားရေးစနစ်နှင့် သင်ရိုးများကို အသစ်ပြင်ဆင်ဆွဲသည်။


ဤလုပ်ငန်း လုပ်ရပ်အားလုံးကို လွှတ်တော် ၂ ခုလုံးက အတည်ပြုသည်။ လိုအပ်သော ဘက်ဂျက်များကိုလည်း စောလျင်စွာ ချပေးသည်။ ပညာရေး အရှိန်အဟုန်မှာ သိသိသာသာကြီး တိုးတက်လာသည်။


မြန်မာနိုင်ငံအမျိုးသားပညာရေးသုတေသန အဖွဲ့ကို သေချာဖွဲ့စည်းပြီး နှစ်စဉ် တစ်နိုင်ငံလုံး တိုးတက်မှုများ ကို အစီရင်ခံစေသည်။ တက္ကသိုလ်ကောလိပ်များနှင့် ပတ်သက်ပြီး အပွင့်သဘောဆောင်သော ပညာရေးစနစ်ကို အစပျိုးပေးသည်။ ဆရာမှ သင် ကျောင်းသားမှ လိုက်မှတ် စနစ်အားဖျက်သိမ်းသည်။ ဆရာကျောင်းသား လွတ်လပ်စွာ ဆွေးနွေးတွေးခေါ်မှု ပုံစံအား ဦးစားပေးသည်။ ကျောင်းသား ကျောင်းသူများကို လွတ်လပ်စွာ ၀တ်စားဆင်ယဉ်စေသည်။ အသိဥာဏ်မြင့်မားပြီး ပညာတက် ပီသစေရန် စည်းကမ်းကြပ်စွာ မထိန်း ကွပ်ပဲ ကျောင်းသားအများလက်ခံနိုင်အောင် ပညာပေးအသိအမြင်ဇာတ်လမ်းမျိုးနှင့် ဆောင်းပါးများစွာ ရေးသားပြီး လူငယ်ကျောင်းသားထု ကြားဖြန့်ဝေသည်။ ကျောင်းသားများ အရင်ကလို မဆိုးမပေကြတော့။ အရင်က ဖိုးသူတော် ငယ်စဉ်ကျောင်းတက်စဉ်က ကျောင်းသားများသည် ဆိုးသည်။ ဆိုးသည်ဆိုသည်မှာ တက္ကသိုလ်ကျောင်းသားပုံစံ ဆိုးချင်းမဟုတ်။ ကလေးဆန်ဆန် ဆိုးချင်ဖြစ်သည်။ ပုံစံများသည်လည်း ကလေးဆန်ကြသည်။ စာပေသင်ကြားမှုဆိုသည်ကိုနားမလည်ကြ။ အချိန်တန်လျှင်ကျောင်းသွားမည်။ အတန်းလစ်ချင်လစ်မည်။ ဆရာတွေကို ရိုသေဟန်ဆောင်၍ ဆရာလာလျင် လက်အုပ်ချီပြီး မင်္ဂလာပါ ဆရာ နှုတ်ဆက်မည်။ စိတ်ထဲတွင် မပါကြ။ ထုံးတန်းဆင်လာကြီး တစ်ခုလို ပြုမှုကြသည်။ ကျောင်းသား ၁၀၀ လျှင် ကျောင်းသား ၉၀ လောက်က တက္ကသိုလ်ဝင်တန်း အောင်၍ တက္ကသိုလ်သို့ ဖြစ်ရိုးဖြစ်စဉ် လာတက်ကြခြင်းဖြစ်သည်။ ပညာရေး၏ အနှစ်သာရနှင့် တက္ကသိုလ်၏ အနှစ်သာရကို ဘွဲ့ရသွားသည်ထိ သိမသွားကြချေ။ တည်ရှိနေသော တက္ကသိုလ်များသည်လည်း ထိုသို့ အနှစ်သာရ သိရှိအောင် လုပ်မပေးနိုင်ကြချေ။ တက္ကသိုလ်များသည် စက်ရုံကြီးတစ်ရုံနှင့် တူနေပြီး ကျောင်းသားများသည် ဘွဲ့တံဆိပ်အမျိုးမျိုးကပ် ထုတ်ကုန် များဖြစ်နေကြသည်။


ထိုထွက်လာသော တံဆိပ်အမျိုးမျိုးထုတ်ကုန်များသည် ဈေးကွက်တွင် ဈေးကွက်မ၀င်ဖြစ်ချေသည်။ ဈေးကွက်ဝင်သော်လည်း တန်ဖိုးချခြင်းခံရသည်။ ထိုအရာ ဖြစ်စဉ်များအားလုံးကို သိနှင့် ခံစားခဲ့နှင့်ခဲ့ရသော ပညာရေးဝန်ကြီး ဒေါက်တာ ဖိုးသူတော်သည် တက္ကသိုလ်စနစ်ကြီးတစ်ခုလုံးကို ပြန်လည်ပြင်ဆင်သည်။ အမျိုးသားပညာရေး သုတေသန ဌာန၏ ဦးဆောင်မှုဖြင့် နိုင်ငံနှင့် အ၀န်း ဇုံများ သတ်မှတ်၍ ဆောင်ရွက်သည်။ အစိုးရသည် ပညာရေးကို များစွာအလေးပေးနေသော အချိန်ဖြစ်သောကြောင့် ပညာရေး ဘက်ဂျက်ကိစ္စအား လွှတ်တော်မှ ခွင့်ပြုသည်။ သက်ဆိုင်ရာ ပြည်နယ်တိုင်းဒေသအလိုက် ပညာရေးဇုံ စီမံကိန်းများ ခွဲပြီး အထူးဖွံဖြိုးရေး အနေဖြင့် ဆောင်ရွက်သည်။ အောင်မြင်ဖြစ်ထွန်းမှု၏ အသီးအပွင့်ကို မကြာခင်မြင်ရချေတော့မည်။


သို့နှင့် ပညာရေးဝန်ကြီး၏ လုပ်နိုင်သောပါဝါများကို သုံး၍အလုပ်ဖြစ်အောင် လုပ်ခဲ့သော်လည်း သူ၏ မူလ ပထမကျောင်းတက်ခဲ့ရာ တက္ကသိုလ်ဖြစ်သော နည်းပညာဆိုင်ရာ တက္ကသိုလ်မှာ အားနည်းနေသည်။ ထိုကိစ္စကို သိပ္ပံနှင့် နည်းပညာဝန်ကြီးအား ပြောဆိုသော်လည်း ၀န်ကြီးသည် အသက်အရွယ်ကြီးနေသည်က တစ်ကြောင်း၊ ၀ိဇ္ဖာ ဘွဲ တစ်ဘွဲ့သာရခဲ့၍ နိုင်ငံရေးခြေလှမ်းတွင် တော်သောကြောင့် ၀န်ကြီး ဖြစ်နေပြီး သူ့လက်အောက် ကိစ္စကို မည်သို့မျှ မတက်နိုင်ပဲ ဖြစ်နေသည်။ ငယ်ရွယ်သော ၀န်ကြီးတစ်ပါး ပြောသည်ကိုလည်း ကောင်းမှန်းသိသော်လည်း လက်ခံဆောင်ရွက်ချင်းမပြုချင်ပဲ တလွဲ မာနကြီးနေသည်။ ပညာရေးဝန်ကြီးသည် ထို ကိစ္စအတွက် ရတက်မအေးဖြစ်နေသည်။ တခြားတက္ကသိုလ် ကိစ္စများတွင်များစွာ ကောင်းမွန်ပြီး ဒေသတွင်း နိုင်ငံများ ပခုံးယှဉ်နိုင်နေပြီဖြစ်သော် နိုင်ငံတစ်နိုင်၏ အဓီက နည်းပညာအခန်းကဏ္ဍမှ ပါဝင်မည့် နည်းပညာတက္ကသိုလ် နှင့် ကွန်ပျူတာ တက္ကသိုလ်များသည် ဖြစ်ဖြစ်မြောက်မြောက် ဘာမှ ဖြစ်မလာသေးပါ။


ဒေသတွင်းနိုင်ငံများမှ နည်းပညာတက္ကသိုလ်များတွင် အာကသသိပ္ပံနှင့်ဆိုင်သော ပညာရပ်များ များစွာ ဖြစ်ထွန်းနေပြီး ဂြိုဟ်တု ပေါင်းများစွာ စမ်းသပ်လုပ်ကိုင်နေကြချိန်တွင် မိမိနိုင်ငံ၏ နည်းပညာ တက္ကသိုလ်များသည် စက္ကူဖြင့်လေယာဉ်ပျံခေါက်သည်ကိုပင် ၂ မျိုးထက် ပို၍ မသင်ပေးနိုင်ချေ။


ကံအားလျော်စွာ ဒေါက်တာဖိုးသူတော်တို့ ပါတီသည် နောက်တစ်ကြိမ် သမ္မတ သက်တမ်းအတွက် ဆက်လက် အနိုင်ရသွားသည်။ သမ္မတကြီးသည် ပညာရေးဝန်ကြီး၏ လုပ်ဆောင်ချက်များကို အထူးသဘောကျ နှစ်သက်၍ ပညာရေးဝန်ကြီးအပြင် ၀န်ကြီးချုပ်ရာထူးကိုပါ တွဲဖက်ပေးလိုက်သည်။ သမ္မတကြီး ၏ ၀န်ကြီးချုပ် ရာထူး ပေးမှုအား ကန့်ကွက်မှုများစွာ ရှိ၍ ပြည်သူ့ဆန္ဒ ခံယူပွဲပြုလုပ်ပြီး မဲခွဲ ဆုံးဖြစ်ရာ ပြည်သူ လူထုသည် ဒေါက်တာဖိုးသူတော်၏ လုပ်ဆောင်ချက်များအား အထူးသဘောကျ၍ ကန့်ကွက်မဲ မရှိ ထောက်ခံမဲ များနှင့်သာ ဆန္ဒပြုကြရာ ဒေါက်တာဖိုးသူတော်သည် မြန်မာနိုင်ငံ၏ ပထမဦးဆုံး အသက်ငယ်ဆုံး ၀န်ကြီးချုပ်ဖြစ်လာသည်။ ၀န်ကြီးချုပ်ဖြစ်လာတော့ အသက် ၄၀ စွန်းရုံသာ ရှိသေးသည်။


ဝန်ကြီးချုပ်ဖြစ်လာသောအခါ ပထမဦးဆုံးဆောင်ရွက်သော ကိစ္စမှာ မြန်မာပြည်တပြည်လုံးရှိ နည်းပညာတက္ကသိုလ်များနှင့် ကောလိပ်များ၊ ကွန်ပျူတာတက္ကသိုလ်များနှင့် ကောလိပ်များ၏ ကိစ္စကို ဆောင်ရွက်သည်။ သင်ရိုးညွှန်းတန်းများကို အခြေခံ သီအိုရီများလောက်သာ ချန်ထားခဲ့ပြီး ကျန်သော ဟောင်းနွမ်းနေပြီးဖြစ်သော သင်ရိုးညွှန်းတန်းများကို ပြင်ဆင်ပြီး ခေတ်မီနည်းပညာ ဘာသာရပ်များဖြင့် အစားထိုးစေသည်။ အမျိုးသားသိပ္ပံနှင့်နည်းပညာဗဟိုကော်မတီကို ဖွဲ့စည်းပြီး ဆိုင်ရာ ကိစ္စရပ်များကို ဆောင်ရွက်သည်။ အာကာသသိပ္ပံပညာကို အထူးစိတ်ဝင်စားသည်ဖြစ်ရာ သက်ဆိုင်ရာ ကျောင်းသားများအား နိုင်ငံခြားတိုင်းပြည်များ ( အမေရိက၊တရုတ်) သို့ စေလွှတ်ပြီး လေ့လာစေသည်။


ကိုယ်တိုင်လည်း အာကာသသိပ္ပံနှင့် ရင်းနှီးမှုရှိအောင် လေတပ်သို့သွား၍ လေယာဉ်မောင်းသင်သည်။ အထက်လွှတ်တော်အမတ် အချို့ ကန့်ကွက်သော်လည်း မဲဆန္ဒနှင့် အနိုင်ရယူပြီး ၀န်ကြီးချုပ်သည် လေယာဉ်မောင်း သင်ပြီး လေယာဉ်မောင်းတက်ခဲ့သည်။ လေယာဉ်မောင်းတက်သည်နှင့် တပြိုက်နက် အမျိုးသားလေကြောင်းနှင့်အာကာသဗျူရို တည်ထောင်ပြီး လေကြောင်းပျံသန်းမှုဆိုင်ရာ ကိစ္စရပ်များနှင့် စည်းမျဉ်းစည်းကမ်းများဆိုင်ရာ ဥပဒေများကို ပညာရှင်များအကူအညီရယူပြီး ပြန်လည်ပြင်ဆင်တည်းဖြတ်သည်။ နောက်ဆုံးထွက်ရှိသော ဥပဒေသစ်အရ ငွေကြေးတက်နိုင်သော နိုင်ငံသားများသည် ကိုယ်ပိုင်လေယာဉ်ပျံနှင့် ရဟတ်ယာဉ်ဝယ်ယူမောင်းနှင်ခွင့်လိုင်စင်ရရှိမည်ဖြစ်သည်။ ကိုယ်ပိုင်လေယာဉ်ကွင်းတည်ဆောင်လိုသူများအနေ ဖြင့် တစ်ဦးတစ်ယောက်တည်း တည်ဆောက်ခွင့်ပေးမည် မဟုတ်ပဲ ၅ ဦးစပ် လေယာဉ်ပျံကွင်းအသေးတစ်ခု တည်ဆောက်ခွင့် ပေးသည်။ ၀န်ကြီးချုပ်ကိုယ်တိုင်လည်း ကိုယ်ပိုင်ရဟတ်ယာဉ်တစ်စင်း ၀ယ်ထားပြီး သွားချင် လုပ်ချင်သော နေရာများသို့ ချက်ချင်းသွားသည်။ လွှတ်တော်မှ နေ၍ ၀န်ကြီးချုပ် လုံခြုံရေးအတွက် ရဟတ်ယာဉ် နှစ်စင်း အစောင့်အဖြစ် ပေးထားသည်။


ဝန်ကြီးချုပ်သည် စာပေ၀ါသနာပါသည့်အားလျော်စွာ ပညာရေးဆိုင်ရာ ဆောင်းပါးများနှင့် ရသ စာပေ များကို ရေးသားထုပ်ဝေသည်။ ရသစာပေများမှာ ပြည်သူလူထု ပရိသတ်၏ အားပေးမှုကို များစွာ ခံရပြီး စာရေး ဆရာတစ်ဦးအနေဖြင့်လည်း ပြည်သူချစ်သော စာရေးဆရာဖြစ်နေသည်။ ၀န်ကြီးချုပ်၏ အိမ်ထောင်ရေး အနေဖြင့် ပညာရေးဝန်ကြီး ဖြစ်ချိန်ထိ အိမ်ထောင်မပြုသေးပဲ လူပျိုသိုးဝန်ကြီးလုပ်နေရာ ၀န်ကြီးချုပ် မဖြစ်ခင်လေးမှာပဲ အိမ်ထောင်ပြုလိုက်သည်။ ၀န်ကြီးချုပ်၏ ချစ်သူက လက်ထပ်ခွင့်အား လက်ခံသောကြောင့် ဖြစ်သည်။ ထိုလက်ထပ်ပြီးသော ချစ်သူနှင့် ၀န်ကြီးချုပ်သည် သူပိုင် ရဟတ်ယာဉ်အား သူကိုယ်တိုင်မောင်းပြီး အနားယူခရီးထွက်ဖို့ ပြင်ဆင်နေရာမှ ဘေးမှ အစောင့်ရဟတ်ယာဉ်နှစ်စီးက လိုက်မည် ပြုသည်ကို ရေဒီယိုစကား ပြောခွက်မှ တဆင့် လှမ်းတားပြီး မလိုက်နဲ့ မလိုက်နဲ့ ဟု ပြောလိုက်သည်။


' ဟေ့ကောင် ဘာကို မလိုက်နဲ့ လဲ ' လို့ အသံကြား၍ ငါလို ၀န်ကြီးချုပ်ကို ဒီလိုပြန်ပြောသလားဆိုပြီး အော်မည် အပြုတွင် လန့်နိုးသွားပြီး ဘေးမှ အခန်းဖော် ၏ ဘာကို မလိုက်နဲ့ လဲဟု မေးသောအသံကို သေချာ စွာပြန်ကြားလိုက်ရသည်။


ဤတွင် အိပ်မက်ပြီး၏…॥။


( ကျတော့်ရဲ့ စိတ်ကူးဆောင်းအိပ်မက်မျှသာဖြစ်၍ သည်းခံ ခွင့်လွှတ်ကြပါရန် မေတ္တာရပ်ခံပါသည်။)


ဖိုးသူတော်

၁၄.၁.၂၀၁၀

၁၇ နာရီ ၁၂ မိနစ်။


Photo source: Internet



Sunday, January 10, 2010

Dogs,Men and Books Reviews


ခွေးများ၊လူများနှင့်စာအုပ်များ

ဒီနေ့ (၁၀.၁.၂၀၁၀) လှည်းတန်းရောက်တာနဲ့ ရာပြည့်စာအုပ်ဆိုင်ကနေ စာအုပ်တစ်အုပ်ဝယ်လာဖြစ်သည်။ စာအုပ်က ဆရာကျော်ဝင်းရဲ့ ခွေးများ၊လူများနှင့်စာအုပ်များ ဆိုတဲ့စာအုပ်ပဲ ဖြစ်ပါသည်။ စာအုပ်က ပထမဦးဆုံးအကြိမ် ထုတ်ဝေခြင်းဖြစ်ပြီး အုပ်ရေ ၅၀၀ ဖြင့် ၂၀၀၉ ခုနှစ် ဒီဇင်ဘာလ တွင် ထုတ်ဝေခြင်းဖြစ်သည်။

စာအုပ်၏ အမှာစာတွင် စာရေးသူ(ဆရာကျော်ဝင်း) က စာအုပ်နှင့် ပတ်သက်၍

၁။ ခွေးများသည်၊ ၂၀၀၇ ခုနှစ်နောက်ပိုင်း၊ စာရေးသူ ဘာသာပြန်ဖြစ်သော၊ ရေးဖြစ်သော အက်ဆေးများကို၊ စုစည်းထားခြင်းဖြစ်ပါသည်။ ရုရှားစာရေးဆရာကြီး အီလျာအာရင်ဘက် ၏ ခွေးများ အက်ဆေးကို ထိပ်တင်ထားပါသဖြင့် ၊ ဤအမည်ကိုပင် ခေါင်းစဉ်တပ်လိုက်ခြင်းဖြစ်သည်။ ကျန်အက်ဆေးများမှာ တိုင်း(မ) မဂ္ဂဇင်း မှဖြစ်ပါသည်။ ပင်ကိုယ်ရေးအက်ဆေးအချို့ကိုလည်း ထည့်ထားသည်။

၂။ လူများမှာ၊ လူပုဂ္ဂိုလ်အချို့၏ တစ်ပိုင်းတစ်စ ရုပ်ပုံလွှာတို့ထိချက်များနှင့် အင်တာဗျူးတို့ဖြစ်သည်။

၃။ စာအုပ်များမှာ၊ ၂၀၀၈ နှောင်းပိုင်း နှင့် ၂၀၀၉ နှစ်ဦးပိုင်းအတွင်း၊ စာရေးသူ မြည်းစမ်းခွင့် ရခဲ့သော စာအုပ်တစ်ချို့ကို၊ မိတ်ဆက်ပေးထားခြင်းဖြစ်သည်။ စာအုပ်အညွှန်းဟု ဆိုင်နိုင်ပါလိမ့်မည်။

ခွေးများတွင် ထိရှပြီး၊ လူများတွင်ဆင်ခြင်စရာအချို့ရကာ၊ စာအုပ်များတွင် ဦးနှောက်မုန်တိုင်း ဆင်နိုင်ကြပါလိမ့်မည်ဟု မျှော်လင့်ပါသည်။

- ခွေးများတွင် အက်ဆေး ၁၉ ပုဒ်ပါဝင်သည်။
- လူများတွင် Profiles and Interviews ၈ ပုဒ်ပါဝင်သည်။
- စာအုပ်များတွင် Books Reviews ၁၂ ပုဒ်ပါဝင်သည်။

အက်ဆေးကောင်းနှစ်သက်သူများ၊ ဆရာကျော်ဝင်းဘာသာပြန်ဆောင်းပါး နှင့် ပင်ကိုယ်ရေးဆောင်းပါးများ နှစ်သက် သူများအနေဖြင့် ဖတ်သင့်သော စာအုပ်တစ်အုပ်ဖြစ်ကြောင်း ညွှန်းဆိုလိုက်ပါသည်။ အောက်တွင် မာတိကာ အသေးစိတ်အားဖော်ပြထားပါမည်။

မာတိကာ
ခွေးများ (Essays)

၁။ ခွေးများ
၂။ ငြင်းရင်း၊ ခုံရင်း၊ ရန်ဖြစ်ရင်း
၃။ သူရဲကောင်းတို့ နေ၀င်ချိန်
၎။ သောဗေဒနှင့် ဒုက္ခဗေဒ ပူးတုံ၊ ခွာတုံ
၅။ သူလိုကိုယ်လို စူပါ ပါဝါ
၆။ တံတိုင်းတွေနဲ့ ကမ္ဘာ
၇။ ကျွန်တော့ မျက်မြင်၊ အိန္ဒိယ
၈။ သမိုင်းသည် နိဒါန်းမဟုတ်၊ မျဉ်းပြိုင်မဟုတ်
၉။ သမိုင်းတစ်ကျော့ ပြန်လည်ခဲ့ပြီ
၁၀။ စူပါ-ကာက သန်းတစ်ထောင်
၁၁။ မိဘမဲ့ တိုင်းပြည်၏ အမျိုးသားရေး အလွမ်းဇာတ်
၁၂။ မင်္ဂလာရှိသော နိုင်ငံရေး
၁၃။ဆင်းရဲမှုထောင်ချောက်
၁၄။ သဘောကွဲလွဲမှု အနုပညာ
၁၅။ တစ်ခုသော နွေဦး၏ လေရူးနှယ် အတွေးများ
၁၆။ သပြေရွှက်ရေ၊ ဆည်းဆာအလွမ်း
၁၇။ ဇရာ၊ သမ္ဘာ၊ ဝေဒနာနှင့် အလှကို ရှာကြည့်ခြင်း
၁၈။ မန္တလေး ဆေးကျောင်းဘေးက ပါရီကဖီးဆိုင်အိပ်မက်
၁၉။ ရွှေအမြုတေ၊ ပေါ်ပြူလာနှင့် ရောက်တက်ရာရာအတွေးများ

လူများ (Profiles and Interviews)

၂၀။ လွတ်လပ်မှု ခရုဆိတ်တာ
၂၁။ နိုဘယ်ဆုရှင်၏ ဒရမ်မာဇာတ်လမ်း
၂၂။ အစိမ်းရောင်သူရဲကောင်းများ
၂၃။ အပြောင်းအလဲနှင့် ခေါင်းဆောင်မှု
၂၄။ သမိုင်းထဲက လူနှင့် စကားပြောခြင်း
၂၅။ အိုင်ဒီအိုလိုဂျီသားကောင်လော- သမိုင်းတရားခံလော
၂၆။ သူတို့ သုံးယောက် ( သို့မဟုတ်) ၂၀၀၉ ကမ္ဘာစီးပွားရေး ကံကြမ္မာကို စီရင်ဆုံးဖြစ်ကြမည့် သူများ
၂၇။ ဟူကျင်တောင် (သို့မဟုတ်) လျှော့တွက်မရသော မာလိမ်မှူး

စာအုပ်များ (Books Reviews)

၂၈။ နဂါးနှင့်ဆင် ဆင်နှင့်နဂါး
၂၉။ ပထ၀ီနိုင်ငံရေး၏ ဂဲသြမေတြီ
၃၀။ မဟာဗျူဟာမြောက် အံ့ဖွယ်ခုနှစ်ပါး မထင်မှတ်သော ရိုက်ချက်များနှင့်
၃၁။ စာနှစ်အုပ်၊ ခေတ်ပြိုင်သမိုင်းနှင့် ပထ၀ီနိုင်ငံရေးတူရူချက်များ
၃၂။အိပ်မက်များ၏ နိဂုံးလော၊ အိပ်မက်ဆိုးကို ပြန်ဖော်ခြင်းလော
၃၃။ ကောင်းတဲ့ အရင်းရှင်စနစ်၊ ဆိုးတဲ့အရင်းရှင်စနစ်နှင့်.....
၃၄။ အိုဘားမားစန်းနှင့် လစ်ဘရယ်လှိုင်း
၃၅။ သမိုင်းဆရာရဲ့ အသပြာခရီး
၃၆။ သားအဖနှစ်ယောက်၊ ဂိုဏ်းနှစ်ဂိုဏ်းနှင့် စစ်ပွဲနှစ်ပွဲ
၃၇။ အမေရိကန်လွန် ကမ္ဘာ
၃၈။ ဟန်တင်ဟန်နှင့် တတိယလှိုင်း
၃၉။ နှစ်ကူးတွင် စစ်သားဟောင်းကြီးတစ်ဦးနှင့် ပြန်တွေ့ခြင်း

လေးစားစွာဖြင့်...

ဖိုးသူတော်
၁၀.၁.၂၀၁၀
၂၀နာရီ ၁၅ မိနစ်

Photo Source : Internet


Saturday, January 2, 2010

First days of 2010


First day of 2010


12:00 AM - ပျော်ရွှင်သော နှစ်သစ်ဆိုပြီး မအော်လိုက်ဘူး။ သီချင်းဆိုနေလို့ဖြစ်မယ်။

1:00 AM - သူငယ်ချင်းတွေနဲ့ တူတူ သီချင်းဆိုနေကြတယ်။ ကိုကျော်ဇေယျ ဆိုင်ရှေ့မှာ။

1:30 AM - သီချင်းဆိုပြီး သိမ်းဆည်းပြီး အင်တာနက် ခဏသုံးတယ်။

2:00 AM - အိပ်ချင်လာလို့ အိပ်လိုက်တယ်။ ထိုင်နိုင်စွမ်းလည်း မရှိတော့ဘူး။

10:10 AM - အိပ်ယာက နိုးလာတယ်။ ရေမိုးချိုးပြီး ရုံးကိုလာတယ်။

11:30 AM - ရုံးရောက်တယ်။ ဗိုက်ဆာတာနဲ့ အစောကြီးထမင်းစားလိုက်တယ်။

12:00 PM - ထမင်းစားပြီး အင်တာနက်သုံးလိုက်တာ ၁ နာရီထိုးသွားတယ်။ ညက အရှိန်ကြောင့် ခေါင်းကိုက်လို့ သွားအိပ်လိုက်တယ်။


1:15 PM ~ 3:00 PM - အိပ်လိုက်တာ ၃ နာရီမှ နိုးတယ်။ ချိန်းထားတာလေး တစ်ခု ရှိလို့အင်တာနက်ခဏသုံးပြီ ချိန်းထားတဲ့ ရှိကိုလာတယ်။

4:15 PM - မြေနီကုန်း ရောက်တယ်။ ကော်ဖီတစ်ခွက်သောက်တယ်။

5:30 PM - လှည်းတန်းသွားတယ်။ စာရေးကိရိယာတွေဝယ်တယ် ။ မ၀ယ်တာကြာလို့လားမသိဘူး ဈေးတွေကြီးလိုက် တာ။ ၂၀၁၀ ခုနှစ်အတွက် ပထမဦးဆုံး စာအုပ် ၂ အုပ်ဝယ်တယ်။ မောင်မြေမှူးရေးတဲ့ မြွေခြေသံ (ပထမအကြိမ်) နဲ့ မြသန်းတင့် ရေးတဲ့ မမ (တတိယအကြိမ်) ။

7 : 00 PM - ရုံးကိုပြန်လာတယ်။ ရုံးပြန်ရောက်တော့ သတင်းတစ်ခုက ဆီးကြိုနေတယ်။ ဆိုဒ်ထဲကဖုန်း ၅ခါ တိတိ ဆက်ကြောင်း။ အရေးကြီးသဖြင့် ချက်ချင်းလာပါရန်တဲ့။ တစ်နေ့လုံး အလုပ်မလုပ်တာ ည ၇နာရီ ကျော်မှ ဆိုဒ်ထဲပြေးရတယ်။ လိုငန်းလိုအပ်ချက်အရအပြီးတိုင်ကောင်းမွန်အောင် ဆောင်ရွက် သော်လည်း ခုထိ အခြေအနေမကောင်းသေးဘူး။ စောစော ထပြန်သွားရဦးမယ်။

11:30 PM - ဆိုဒ်ထဲကပြန်ထွက်လာနိုင်ပြီး အဆောင်ရောက်တော့ ည၁၂ ထိုးခါနီးနေပြီ။ ဗိုက်ထဲမှာ မနက် ၁၁ နာရီလောက် ကတည်းက စားထားသော ထမင်းသာရှိသည်။ ညနေ ကော်ဖီ တစ်ခွက်သောက် ထားတာပဲ ရှိသည်။ လွန်မင်းစွာ ဆာနေသော်လည်း အစာလွန်သွားသဖြင့် ကြာဆံပြုတ်တစ်ပွဲ၊ မိုင်လို တစ်ခွက်ဖြင့် သာ တင်းတိမ်လိုက်သည်။

ဤတွင် ၂၀၁၀ ဇန်န၀ါရီလ ၏ ပထမဆုံးရက် တစ်ရက်တာ ပြီး၏။ ဒီစာရေးတော့ ၂
ရက်မြောက်ဖြစ်နေသည်။ အားလုံးပဲ ကောင်းချီးမင်္ဂလာ အဖြာဖြာ ဖြစ်ကြပါစေသောဝ်။


ဖိုးသူတော်
၂.၁.၂၀၁၀
ဝ နာရီ ၅၅ မိနစ်

Photo source : Internet